`

生果金變身生果卡

曾特首話「生果金唔係生果金」,其實係有佢深層道理。 佢話有老人家依家要用生果金養老,破壞生果金原則,因此有關制度,需要修改(其實係取消)。而就養老金而言(生果金即時變身養老金,就好似存戶不知就裡變身專業投資者一樣),為公平原則,是應該經過審查,我諗佢意思係有老人家有錢養老,所以唔需要呢養老金(咁生果金呢!);另一老人家冇錢養老,所以需要呢養老金(此乃由生果金即時變身!)。呢招移形換影,真係可以用一個「絕」字形容(既解決了殖民地時期歷史性福利,並為養老服務提供必要之融資來源)。其政策目標正確(希望唔係我會錯意就好!),值得讚賞! 但執行之過程用資產審查進行,則未免眼高手低。我想曾特首同佢班智囊都應該好清楚,要推行一個計劃,若果一開始就俾人睇到「政府唔想比錢」呢種心態,就算個方案點好,點照顧社會利益同需要,都難免受到一班玩出位之政客攻擊,使到呢個應該係正確構想,都遇到很大對抗。(個59歲政客用到「傷透老者心」針對,令到64歲曾特首都要飲啖水,壓驚(先下到火?)。見到呢兩個接近「阿伯」級「長者」用咁煽情語氣討論呢個問題就真係有騎呢,斷估佢兩位「老人家」等到七十五歲先生果金都冇乜問題(退休後分別有阿仔同阿爺養也!),但對一就五十而接近失業「阿叔」「阿嬸」,佢希望五十歲就有得!) (以下係跟曾特首諗法,傻傻咁諗出!) 其實要查出「生果金」係唔係「生果金」,靠資產審查係查唔到!要查當然要查老人家佢點駛錢先查到。(斷估當中一定有用買雷似迷李債券呢高風險高回報衍生投資產品!)但要查以前支出,未免太費時失事。要查「生果金」係唔係「生果金」,其實並不難,只要每個老人家俾張「生果卡」佢就得。將「生果金」定時存入個「生果卡」,駛「生果金」時就碌一碌張「生果卡」,資料不就一目瞭然嘛!到時政府就可以獲得有關數據,去查證「生果金」究竟係唔係「生果金」! 呢條其實係絕世好橋!點解咁講? 呢張「生果卡」其實可以當係八達通咁駛,並且引入不同商戶參與,在不同商戶消費陣,部份金額需要回饋政府,而政府則可以用回饋之金額撥入社會養老服務之融資需要,協助真正有需要之老人家,商戶之回饋金免稅,回饋金額最高之商戶並可獲政府之褒獎,提升其知名度。 案例: 陳伯從政府每月獲得「生果金」一千元(既然有回饋計劃,加又何妨!),全數存入其私人「生果卡」內。陳伯肚餓去大家X買個叉燒飯套餐三十元,大家X同佢碌一碌張「生果卡」,扣佢三十元,但由於此商戶之回饋率是百份之二十,因此大家X實收二十四元,六元回饋政府用於養老服務。(代政府多謝大家X!)陳伯跟住有口渴,用五蚊樓下士多買支可樂飲,由於樓下士多亦有參加「生果卡」計劃,回饋率是百份之十(回饋率乃自願或按規模大小計算),因此樓下士多實收四元五角,五角回饋政府用於養老服務。(亦代政府多謝樓下士多!)其後陳伯想賭馬仔,到投注站買三百蚊二串三,由於馬會亦有參加「生果卡」計劃,回饋率是百份之五十(回饋率高是因為生果金不應用於博彩,但為尊重個人自由,不嚴格制止),因此馬會實收一百五十元(識賭馬就知馬會係唔會蝕本!),一百五十元回饋政府用於養老服務(亦代政府多謝馬會!?定係陳伯?)。其後陳伯輸馬仔,想去深水搵大波蓮出出火。由於大波蓮冇參加「生果卡」計劃(唔俾參加!),碌唔到陳伯張「生果卡」,陳伯只好去銀行將生果卡剩餘幾舊水七折兌現(另外三成回饋政府用於養老服務),然後才去深水搵大波蓮。(亦代政府同大波蓮多謝陳伯!!) 呢條橋真好得!版權所有,歡迎翻印! 政壇Porkguy 20-10-2008
SUPER 豬肉佬 SUPER

TOP