`

罪在銀行,錯在存戶。迷債事件,監管不當

高薪厚祿、高高在上之任總發脾氣了。 班友仔攪咁耐都埋唔到一單Case,俾議員狂炳8粒鐘後,死死地氣應承本周內完成第一單Case,都算無面了。 我想任總諗到每日倒塔咁早返工(上班前發言總早過鬍鬚曾可見一班),每晚睇CNBC睇到天光,仲要俾隻癲狗亂吠,唔慶就假。 難怪佢老哥都忍唔住,當住鏡頭前搵阿蔡出出氣,見佢髮尾都彈起,確實幾勞氣。 其實佢老哥確實武功高強,坐呢個位咁多年,銀行存戶一分錢未輸過(迷李債券的苦主唔算,因為阿公阿婆不知就裡已經變晒專業投資者)。而且見過大風大浪,過去戰績標炳,在普羅大眾眼中,算是特區政府最見得人件。就算今次有苦主四萬以上,我想大部份香港人都唔希望任總起身,諗起若果佢真係起身,剩低鬍鬚曾同書生強,香港可能更加無運行。 任總在立會斬釘截鐵話自己做足工夫,是否屬實。我則有如下意見。就監管銀行不適當(可能屬非法)推售高風險金融產品,任總聲稱爆煲前已多次警告金融機構,並就若干金融產品提出超越其監控原則(披露為原則)之警告聲明,已顯出金管局已盡職處理,他又提出有關銀行之強烈反抗意見,更可視為其監管力度不弱之證明,說得合理而漂亮。此外,金管局官員在其他場合亦曾說過由於現行條例下之刑罰太輕,就算證明銀行真的不法銷售,亦不能促使銀行作出賠償。金管局權力不足,造成銀行變本加厲之情況,說法亦頗合情理。 總之一句,罪在銀行,錯在存戶。是否如此?(在下以為放錢在銀行的便是存戶,不理他是做定期、買股票也好,只因銀行掛了一個招牌叫「銀行」,放度錢就係存款,存款變了其他東西,就係非法經營,這是阿公阿婆的道理,上法庭都係咁講,因此絕不同意錯在存戶!!) 我以為若果金管局官員(包括任總)真係覺得冇錯話,倒不如叫佢早拜拜,事關這些只是藉口,監管不力、執法不公,就是他們之罪狀。 罪狀如下: 金管局在知道事情頗為嚴重情況下,只進行監管而沒有執法是否有問題? 金管局在知道權力有限之環境下,而不提出修定是否有問題? 分析結果只有兩個: 若覺沒有問題,則能力實在太差了! 若覺有問題而不做,便實在太怕事了! 這樣之情況,只有一個結果,香港的金融制度將會出事。迷債事件,損失超過一百億,苦主四萬多,就是一個悲壯的結局。在這情況下,就算唔辭職,都足夠你講句Sorry! 立會上,任總亦忍唔住show其市場智慧,話遲賣可能好,因為美國救市會購入有關債券,屆時有市有價,損失會較少。任總係唔係short!頭政府勸緊苦主快同意回購方案,呢頭佢叫苦主持貨觀望先,係唔係講多呢? 不過佢專業意見亦值得參考下,點解唔叫銀行在回購時出多個Call俾班苦主,等個價在真正清盤時起番陣俾苦主有機會番多,可能個心又舒服。(話唔埋個市癲起上,呢Call俾班苦主賺突都有可能)但呢橋,特區政府裡面,除任總,又仲有邊個識? 政壇Porkguy 14-10-2008
SUPER 豬肉佬 SUPER

TOP